Davao City – Ang kakuwang sa paghatag og pagtagad sa gobyerno sa mga mag-uuma maoy rason ngano mahutdan og suplay sa bugas ang National Food Authority (NFA) sama sa nahitabo karon.
Ang walay pagpakabana sa kagamhanan diha sa Department of Agriculture (DA) ug NFA maoy nagpahuyang karon sa supply sa bugas sa merkaduhan.
Malisud na ang kahigayonan nga makagawas ang Pilipinas sa iyang sobra ka pagsalig sa laing mga nasud busa padayon gayod masinati ang rice shortage, segun sa maong opisyal.
Sigun ni PISTON-SMR Spokesperson Ricky Baron nga aron mag-stable ang supply sa bugas sa nasud gikinahanglan i-prayoridad sa kagamhanan ang mga mag-uuma sa Pilipinas.
Gidasonan ni Baron nga walay rason aron makuwang ang supply sa bugas sa Pilipinas kay kung buot isi-pon halapad p aman ang kayutaan sa nasud nga puwede himoong kahumayan.
Nagtoo kini nga ang rice shortage resulta kini sa sabotahe sa mga dagkong negosyante ug mga traders aron ipagawas nga dunay krisis sa bugas diin ang dirikta nga apektado ang mga yanong lungsuranon.
Pikas bahin, gisaway sa tigpamaba sa hut-ong sa mga drivers ug mga operators ang pagbungkag sa protesta sa mga mag-uuma sa buhatan ni DA Secretary Manny Pinol didto sa kauluhang Manila sa miaging semana.
Gipanawagan ni Baron ang pagpakanaog sa katungdanan sa mga opisyal sa Department of Agriculture ug National Food Authority tungod sa kapakyas sa ilang trabaho sa NFA diha sa pagseguro sa igong supply sa bugas.
RadyoMaN Joel Viray
