Gonzaga midepensa sa wala pagpirma ni RCL sa fidelity bond

318

Hugot nga gibarugan ni Kapitan Dodong Gonzaga sa Brgy. Ampayon nga iyang katungod ang pag-kwestyon sa ‘fidelity bond’ alang kang Kagawad Maisog kinsa maoy gitudlong OIC sa Barangay Hall sanglit nagtoo kini nga siya ang lehetimong Punong Barangay sa Ampayon ug kinahanglan na siyang makalingkod sa gahum.
Kini ang reaksyon ni Gonzaga sa interview sa RMN DXBC Butuan subay sa reklamo karon sa mga Brgy. Kagawad sa brgy. Ampayon nga paralisado ang tanang pinansyal nga transaksyon tungod kay wala aprobahi ni Mayor Ronnievic Lagnada ang fidelity bond ni Kag. Maisog.
Aminado siya nga looy ang kahimtang karon sa Brgy. Ampayon apan iyang ipadayon ang legal nga kawsa aron hingpit nga makalingkod isip Punong Barangay. Nagtoo si Gonzaga nga walay kalambigitan ang iyang pag-kwestyon sa pagka-OIC ni Kag.
Maisog nganong wala aprobahi ni Mayor Lagnada ang fidelity bon niini sanglit nangita usab ug legal nga basihan ang buhatan sa Mayor.
Gibasul ni Gonzaga ngadto sa DILG ang problema karon sa Brgy. Ampayon gumikan sa sayop nga desisyon niini nga nag-ila kang Kag. Maisog isip OIC. Andam hinoon niyang hangyoon si Mayor RCL aron pirmahan ang fidelity bond tungod ug alang sa kaayuhan sa taga Brgy. Ampayon.
Ang fidelity bond usa ka requirement sa usa ka kapitan arun maka proseso sa paggamit ug pagpagawas sa pundo sa barangay.

Facebook Comments