“Good Education in Beautiful Schools” kon GEBS initiative sa DEPED-Bukidnon, gi-ila

57

GIILA sa Provincial Government of Bukidnon human gitunol sa Sangguniang Panlalawigan (SP) ang kopya sa resolusyon ngadto kang Schools Division Superintendent Randolph B. Tortola, Ph.D., CESO V sa Department of Education (DepEd)-Bukidnon nga nag-ila sa iyang paningkamot ug pamaagi sa pagpasiugda sa programa nga gitawag ug “Good Education in Beautiful Schools” (GEBS) diha sa tanang pampublikong tunghaan sa elementarya ug sekondarya sulod sa probinsya sa Bukidnon.

Sa mosyon ni 3rd District Board Member Minerva C. Casinabe, ang mga magtutudlo adunay hinungdanon nga tahas sa pagmugna ug usa ka matahum nga palibot nga makadasig sa mga estudyante nga ganahan magkat-on ug mga leksyon. Dugang pa, ang DepEd nahimong hinungdan sa maayo ug kalidad nga sistema sa edukasyon tungod kay nagtugot kini ug pakiglambigit sa stakeholders aron magtinabangay alang sa kaarangan sa kahibalo sa kabataan. Dinhi gipaila ni Dr. Tortola ang usa ka participative ug community-based support system nga nahiuyon sa nasudnon ug lokal nga pangagamhanan nga mga programa sa edukasyon.


Ang GEBS nga gisugdan niadtong Pebrero tuig 2020 sa tanang 20 ka mga lungsod sa 47 ka mga distrito sa Bukidnon, naghatag ug positibo nga epekto diin nag-awhag sa suporta sa komunidad uban sa paghatag gimbug-aton sa kalidad nga edukasyon ug maayong palibot alang sa pagkat-on. Kauban niini nga programa ang mga tagdumala sa tunghaan, magtutudlo ug kawani sa DepEd-Bukidnon, ginikanan ug hingtungdan lakip ang mga kauban sa pagpatuman sa edukasyon, nga nagresulta sa bag-o ug maanyag nga talan-awon sa nagkalaing-laing tunghaan sa elementarya ug sekondarya.

Pipila sa mga monitoring checklist sa GEBS implementation mao ang mosunod: pag-ayo ug pagpagwapa sa school gate, koral sa eskwelahan, school signboards, ground landscaping, playground, pagpintal sa building, flagpole ug daghan pa.

Gipasabot ni Dr. Tortola sa iyang presentation sa SP nga gipaningkamotan niya uban sa mga kaubanang empleyado nga maatiman ug maprotektahan ang 605 ka mga tunghaan sa DepEd Bukidnon [505 Elementary Schools, 63 Junior High Schools, 57 Integrated Schools] ning panahon sa pandemya.

Gipadangat usab niini ang mga pamaagi sa mga magtutudlo kaabag ang mga opisyales sa barangay diha sa paningkamot nga makakat-on gihapon ang kabataan bisan ug wala sila mag-adtuan sa ilang eskuylahan tungod sa COVID-19, pinaagi sa alternative o blended learning strategies, diin adunay 79 ka mga tunghaan ang nagpahigayon sa radio-based instruction ug ang uban naglusad sa radyo trumpa edukasyon aron sa pagsiguro nga mahatud ang kalidad nga edukasyon sa Bukidnon.



Facebook Comments