Nagapati si Governor Arthur Defensor nga ginagamit ang iya pangalan sa scam agud maguba ang iya imahen karon nga nagahilapit ang eleksyon.
Ini ang reaksyon sang gobernador kasunod sang natabo sang nagligad nga Huwebes, Nobyembre 22, 2018 kon sa diin, pila ka sikat nga restaurant sa syudad ang nagreklamo bangud suno sa mga ini, nagtawag ang isa ka lalaki kag gingamit ang pangalan sang gobernador agud mag-order sang pagkaon kag ilimnon kag naghingyo pa sang load.
Suno kay Defensor, posible bata-bata lang sang iya mga kasumpong sa pulitika ang nagagamit sang iya pangalan agud magpanunto sa pila ka mga restaurant sa syudad.
Katingalahan man suno kay Defensor kon nga siya ang ginahingabot bisan indi siya ang nagakandidato.
Posible suno kay Defensor nga nagapati ang iya mga kasumpong nga kon maguba sang mga ini ang iya imahen, maapektuhan ang kandidatura ni Cong. Arthur ‘ Toto’ Defensor sa 2019 Elections.
