Bacolod City – Ginpaboran ni Governor Alfredo Marañon, Jr. ang matunog nga balita nga magapapili si Negros Occidental 3rd District Congressman Alfredo ‘Albee’ Benetiz bilang masunod nga gobernador sang probinsya.
Suno kay Marañon, yara sa maayo nga kamot ang probinsya kon ini ang dumalahan ni Benetiz sa diin nagapati siya nga ipadayon sini ang iya ginsuguran nga mga programa.
Si Benetiz ang yara na sa iya ulihi nga termino bilang Congressman kaangay man ni Marañon nga ara naman sa ulihi niya nga termino bilang gobernador.
Una na nga ginpahayag ni Cong. Benetiz nga may nagaduso sa iya sa amu nga posisyon apang wala pa sya sang desisyon tuhoy diri bangod madamo pa siya sang tapuson sa iya distrito.
Ang bise-gobernador nga kaupod naman ni Cong. Albee sa Love Negros nga si Vice-Governor Eugenio Jose ‘Bong’ Lacson ang nagpabutyag nga sa karon wala pa siya sang desisyon kon anu nga posisyon ang iya pagasudlan sa 2019 elections. Pahayag pa ni Lacson nga sa Oktubre 2018 pa siya magahimo sang desisyon kaangay man sang natabo sang 2016 elections.
Sang 2016, suportado sang grupo ni Lacson kag Benetiz si Governor Alfredo Marañon nga ara naman sa pihak nga partido, ka tandem si anay 4th District Congressman Jeffrey Ferrer.
Si Ferrer ang wala naman mahibaluan kon ini ang magapapili pa liwat sa probinsya.
