GOV NENE JALOSJOS NANUMPA NA, KATAPUSANG ADLAW SA KASAKAZA 2022 GIDUMOGAN SA MGA KATAWHAN

28
Nanumpa si Zamboanga del Norte Governor Rosalina “Nene” Jalosjos atubangan ni Subanen Timoay Labi Jhonny Anugon Sr. sa Tribal Chieftain sa Lungsod sa Siayan sa probinsiya kaniadtong Hulyo 02, 2022 sa may alas 4 ang takna sa kahaponon didto sa Zamboanga del Norte Cultural and Sports Center.
Sa wala pa ang seremonyas sa inagurasyon, nagpahigayon sa usa ka Thanksgiving Mass didto sa St. James the Greater Parish sa Dapitan City nga gitambongan sa iyang pamilya, kaparyentehan, mga kapitanes ug coordinators, mga supporters ug transition team.

Nangulo sa maong misa-pasalamat si Bishop Most Reverend Severo C. Caermare, ug 15 ka mga pari sa Diocese of Dipolog.
Human sa misa, gisunod gilayon ang motorkada libot sa sentro nga kadalanan sa dakbayan sa Dapitan isip panamilit sa katapusang hugna sa tulo ka termino isip mayor ug milahos ang rota didto sa dakbayan sa Dipolog.
Sa mensahe ni Gov. Nene Jalosjos nga ubos sa iyang administrasyon, iyang tan-awon nga moabot sa pinakasuok ug pinakatumoy nga bukid ang mga hinabang ug kaayohan alang sa katawhan.
Pamahayag pa niya nga iyang paningkamotan nga walay mausik nga pondo ang sa probinsya.
Nanawagan usab ang gobernador sa mga katawhan, iyang mga kaubang trabahante sa kapitolyo, ug sa tanang units sa Zamboanga del Norte nga tabangan ug duyogan siya sa iyang mga plano alang sa probinsya.
Human sa siyam ka tuig nga wala nga wala na madungog ug wala gikanta sa matag programa nga gipahigayon, gikanta pagbalik ang Zamboanga del Norte Hymn sa Bisaya Version nga “ABANTE ZANORTE, ATOA KINI”.
Sa susamang adlaw may alas 11 sa udto ngadto sa alas 2:30 sa hapon, isip pagtak-op sa KASAKAZA 2022 ug pagsugat sa adlaw sa Inaugural Celebration, ang mga Dabarkads sa Eat Bulaga nga noontime show sa GMA Network nga sila Vic Sotto, Pauleen Luna-Sotto, Ryan Agoncillo, Maine Mendoza, Allan K, Jose Manalo, Wally Bayola, Paolo Ballesteros, Ryzza Mae Dizon, Maja Salvador, Miles Ocampo ingon man si Juan Karlos, Ronnie Liang, ug Tony Labrusca ang midugang sa dakong kahugyaw sa mga katawhan sa Dipolog, Dapitan ug tibuok probinsya sa Zamboanga del Norte.
Duha sa mga nahimong mananaug sa gameshow sa Eat Bulaga mao ang working student nga si Melanie Taguibolos taga Turno, Dipolog City ang mipauli nga bitbit ang P135,000.00 ug laing mananaug nga taga Brgy. Barra sa dakbayan sa Dipolog alang sa Paro-Paro G.
Makita nga sayo pa lamang sa buntag oras tingpamahaw, taas na ang linya sa mga buot mosulod sa Zamboanga del Norte Cultural and Sports Center aron saksihan sa nga katawhan ang programang Eat Bulaga nga gidumogan sa bagang duot sa katawhan.(mitzieadulawan)

Facebook Comments