Zamboanga del Norte- Ugmang adlawa December 28,2017 ang sumad sa adlaw ug petsa kondiin gipakatawo si Governor Roberto Uy apan dili na siya magsaulog pa niini tungod sa nahitabo nga kalamidad nga miigo sa pipila ka mga lungsod sa tersiro distrito sa Zamboanga del Norte.
Sama sa naandan nga atol sa kasumaran sa iyang adlaw nga natawhan magsaulog ang nahisgutang gobernador sa usa ka magarbohong salo-salo (party) sa iyang mga kawani ug mga bisitang katawhan apan karong panahona dili na kini himoon pa kay didto niya kini ibuhos ngadto sa mga biktima sa kalamidad (baha,hangin ug pagbusdak sa ulan).
Gipasabot sa iyang designate head sa provincial information center,executive assistant 1V Mr. Praxy Rubia sa DXDR RMN Dipolog sa Straight to the Point nga nagdesisyon si governor Uy kay dako kini ug kasubo sa gidangatan sa mga katawhan tungod sa kalamidad.
Ug gani hangtod karon nagpadayon pa ug search and rescue operation ang local disaster risk reduction and management didto sa lungsod sa Siocon nga nag-una sa ilang gikinahanglan mao ang tubig mainom. Ang lungsod sa Gutalac mao ang pinakataas nga record sa nangamatay nga mokabat ngadto sa 21 ug 20 ang missing nagsunod ang Sibuco 18 ang patay ug 8 ang missing ug 2 ang samaran. Samtang ang lungsod sa Salug adunay 15 ang patay 7 ang samaran ug 1 missing, adunay 4 sa Liloy ang patay, 6 sa Baliguian ug 1 ang patay sa lungsod sa Labason Zambaonga del Norte.
Sa pagkakaron gikatakda nga magpahigayon ug session regular ang hunta probinsyal aron tukion ang gipangayo sa gobernador aron magdeklara ug State of Calamity apan una na niini nagpadala na usab ug pasiunang hinabang ang kagamhanang probinsyal ngadto sa mga nabiktima.
