Gov. Roberto Y. Uy mopahigayon na usab sa 2019 state of the province address: katawhan dapat masayud sa kalambuan karon

20

Dipolog City-Sulod sa unom (6) ka tuig nga pagdumala isip hepe ehekutibo sa probinsiya sa Zamboanga del Norte, ipahigayon na usab ni Governor Roberto Y. Uy ang ika-unom niini nga State of the Province Address (SOPA) alang karong tuig 2019 isip pagpahibalo sa mga katawhan nga iyang gialagaran sa mga nahimo niini nga mga proyekto ug mga programa sa kalambuan, kauban usab sa pakigtambayayong sa lehislatibo nga gipangulohan ni Vice-Governor Senen O. Angeles isip Presiding Officer sa Sangguniang Panlalawigan sa Zamboanga del Norte alang sa pagpasar sa tinuig nga budgets lakip na ang mga mahinungdanon nga mga balaodnon.

Si Majority Floor Leader Crisologo A. Decierdo ang mipasupot sa resolusyon nga nagpahibalo sa pagbalhin sa regular session sa mga sakop sa sangguniang panlalawigan karong umaabot nga Lunes, Marso 25, 2019 sa may alas 2:00 p.m. diha sa Zamboanga del Norte Convention & Sports Center (ZNCSC) alang sa ipahigayon usab nga 2019 State of the Province Address (SOPA) ni Governor Roberto Y. Uy subay usab sa gipadala nga sulat ni Provincial Administrator Romeo C. Reyes pinetsahan ug Pebrero 22, 2019.

Diha sa SOPA, masayran sa mga katawhan ning lalawigan ang mga proyekto sa imprastraktura, nagkadaiyang programa sa agrikultura alang sa pagpalambo sa panginabuhi sa mga kabus nga mga katawhan sa mga kabaranggayan, pagtutok ug pagpalapad sa mga programa sa maayong panglawas, pagpalambo sa dekalidad nga edukasyon sa mga kabataan, paugnat sa kusog, pagpreserba ug proteksyon sa kinaiyahan, pagpakabana alang sa paglikay ug pagpangandam sa emerhensiya panahon sa mga kalamidad, pagtino sa kalinaw ug seguridad sa probinsiya, paghatag sa hinabang sa mga kabus ug uyamut ug daghanan pa.

Facebook Comments