Manukan, ZDN-Laing proyekto na usab ang pagasugdan sa dili madugay human gipahigayon ang groundbreaking ceremony sa 1.3 kilometros nga pagsemento Provincial Road sa Brgy. Serongan lungsod sa Manukan ning lalawigan sa Zamboanga del Norte.
Pinangulohan ni Gov. Roberto Y. Uy ug Manukan Municipal Mayor Eugene U. Caballero, ang seremonya gisugdan sa usa ka blessing pinaagi ni Father Norberto Maribong ug gisundan kini sa ribbon cutting nga gipangunayan ni Gov. Uy ug Mayor Caballero uban sa representante sa DILG (Department of Labor and Employment), Brgy. Kapitan Luisita D. Catipay ug mga konsehal niini.
Ug aron makompleto ang seremonya, gi-unveil dayon ang Project Billboard diin dinhi nakita ang kantidad sa proyekto nga P13,137,598.49 gikan sa pundo sa DILG ilawom sa programang SLRF (Special Local Road Fund).
Si Kapitan Catipay ang nipasalamat ni Gov. Uy tungod kay wala siya pakyasa sa gobernador sa iyang hangyo sa dihang iyang gipangsang-at sa buhatan sa nahi-una ang iyang yangu-ngo.
Dugang sa kapitan nga gi-aprobahan usab ni Gov. Uy ang laing duha ka proyektong 500 meters road concreting duol sa ilang tulunghaan ug covered court sa iyang barangay.
Atol sa hamubong programa nga gipahigayon, gibutyag ni Gov. Uy nga iyang sementohon ang tanang dalan sa maong barangay lakip na ang kasikbit niini tungod kay naluoy siya sa mga lumulupyo tungod kay matod pa niya, singko sentabos na lay plite niini padung sa langit. Kini tungod usab sa ka bungtod ug ka-angaton sa nasangpit nga lugar.
Matod usab sa niini nga dili lamang inprastraktura ang pwedeng ihatag sa iyang administrasyon kon dili andam usab siyang motabang sa mga mag-uuma nga nanginahanglan ug abono, kabaw ug daro. Ang buhaton lamang sa mga mag-uuma, moduol sa hingtungdang buhatan sa probinsiya aron kini ma-ayudahan.
Ang Brgy. Serongan adunay kapin 1,500 ka mga lumulupyo ug nagkinahanglan kini sa road concreting projects aron mahamugaway ang pagdala sa ilang kopras ug ubang produkto sa agrikultura ngadto sa sentro.
Nasayran nga aduna pay proyektong padayon karon gi-implementar sa kagamhanang probinsiyal, kini mao ang 1 km Concreting of Libuton-Serongan Provincial Road (Libuton-Longilog Section) nga nagkantidad ug P5,070,000.00.
Nitambong usab sa nahisgutan nga kalihukan si Bokal Boy Lee sa Segundo Distrito, Executive Assistant IV Praxides P. Rubia, mga enhinyero sa Provincial Engineering Office, mga personahe sa nagkalain-laing buhatan sa kagamahanang probinsiyal ug mga lumulupyo sa Brgy. Serongan. (PIC-elds)
