GOVERNOR DEFENSOR, NAGPAGUWA SANG EXECUTIVE ORDER NGA NAGA-SUSPEND SANG TANAN NGA DALAGKU NGA PAGTILILIPON SA PROBINSYA SANG ILOILO SA SULOD SANG 45 KA ADLAW.

Ginpaguwa na ni Governor Arthur Defensor Jr. ang executive order nga nagamandu sa pagsuspend sang tanan nga aktibidad kag kahiwatan nga may madamo sang tumalambong .
Ang executive order number 028-B ginpaguwa sang gobernador pasado alas 6 kagab-i kon sa diin magalawig sang 45 ka adlaw ang suspension sang dalagku nga aktibidad umpisa subong nga adlaw, Marso 11.
Ini nga tikang kabahin sang pagtinguha sang Lokal nga Panguluhan sang Probinsya sang Iloilo nga mapunggan ang posible paglapta sang COVID-19 sa probinsya.
Ginhimo sang gobernador ang nasambit nga tikang bilang sabat sa deklarasyon sang DOH nga CODE RED alert sub-level 1 kag subong man pagpaidalum sa bug-os nga pungsod sa state of health emergency bangud sa pamahog sang COVID-19.