GOVERNOR ZUBIRI MIHATAG UG BAG-ONG DIREKTIBA NGADTO SA TANANG MGA MAYORES KABAHIN SA PAG APOD-APOD SA AYUDANG PAGKAON GIKAN SA KAGAMHANANG PROBINSYAL SA BUKIDNON

52

MIHATAG ug bag-ong direktiba si Provincial Governor Jose Ma. R. Zubiri Jr. ngadto sa tanang mga mayores sa probinsya kabahin sa pagpang-apod-apod sa pagkaong-ayuda atol sa iyang pagpatawag ug press briefing kagahapong adlawa sa Provincial Governor’s Office, Capitol Compound, Malaybalay City, Bukidnon.

Sa iyang pamahayag, iyang gimanduan ang tanang mga mayores sa pagtunga sa makaduha ang gigahing tag-usa ka sakong bugas ug tag-duha ka kartoon nga de lata ngadto sa mga pinaka kabus nga pamilya ug usab niadtong pamilyang kabus nga apektado sa “no work, no pay” policy. Kini iyang gibuhat tungod sa hangyo sa mga katawhan nga maangay og makadawat ang tanan nga apektado sa krisis tungod sa COVID-19.


Kahinumuman nga mipatawag ug final meeting si Gov. Zubiri sa nilabay’ng adlaw aron sa paghisgot sa mga pamaagi sa pagpanghatag sa pagkaong-ayuda.

Diin, na desisyonan nga tag-usa ka sakong bugas ug duha ka kartong sardinas ug beef loaf/meat loaf ang madawat sa pamilyang anaa sa lista sa poorest among the poor nga nagagikan sa C/MSWDO apan sa nahitabong press briefing karong adlawa, giklaro sa Gobernador nga nakadesisyon siya nga himuong tagtunga nalang sa sako nga bugas, tunga sa karton nga sardinas ug tunga sa karton nga beef loaf/meat loaf ang madawat sa matag pamilyang benepisyaryo.

Kadtong LGU nga mohatag ug in-cash, gi-awhag usab sa pagtunga sa kantidad nga ihatag ngadto kanila. Gilantaw kini sa gobernador nga mas maayong pamaagi aron maapod-apod ug mahatagan ang pamilyang kabus nga wala sa listahan sa poorest among the poor nga apektado sa krisis sa COVID-19.

Sa katapusan, gi-awhag sa Gobernador ang tanang katawhan sa makanunayong pag-ampo ngadto kang Sta. Maria ug Kang Hesukristo alang sa pagpangayo ug proteksyon niining kasamtangang hulga sa COVID-19.

Facebook Comments