Gov’t vehicle nga nag-deliver og relief goods sa Maragusan natumba, 10 sakay luwas

Davao City – Gikumpirma sa Maragusan Municipal Police Station nga luwas ang napulo (10) ka mga sakay lakip na dinhi ang driver human natumba ang usa ka dump truck sa Purok Managhiusa, Barangay Tandik, Maragusan, Davao de Oro pasado alas 2:00 sa hapon, Abril 3, 2023.

Sa interbyu sa DXDC RMN Davao kang Police Master Sergeant (PMSG) Emmanuel Siblos, imbestigador sa Maragusan MPS, giila niini ang driver sa dump truck nga si Adrian Buhat, Jr. 50 anyos, taga Nabunturan, Davao de Oro. Uban niini ang mga personahe sa Provincial Disaster Risk Reduction and Management Office (PDRRMO) ug Provincial Social Welfare and Development Office (PSWDO) ug volunteers.

Saysay ni Siblos, nag-deliver og relief goods sa evacuation center alang sa mga biktima sa linog sa munisipalidad sa dihang nahitabo ang insidente.

“Nagpadaplin siya ba unya pangpang gamay ang kilid. Unya, pag-agi niya, natipak ang kadtong yuta nga iyahang giagian. Mao to, naligid gamay ang dump truck,” sulti sa imbestigador.

Dali usab nga gidala sa hospital ang mga sakay nga naka-angkon lamang og minor injuries.

RadyoMaN Kirby Manzon