Davao City – Maglisod og arangkada ang ekonomiya sa nasud kung magdugay pa ang Enhanced Community Quarantine (ECQ) nga gipatuman sa kagamhanan hatud sa epekto sa 2019 coronavirus disease kon (COVID-19).
Matud si financial analyst Prof. Astro Del Castillo, maglisod kon madugayan og bangon ang ekonomiya sa Pilipinas kung madugayan pa ang implimentasyon sa ECQ sa nasud.
Luyo niini, girespeto gihapon sa professor ang hukom ni Pres. Rodrigo Duterte nga mabutang sa ECQ ang nasud uban sa paglaum nga makabaton na og bakuna ang gobyerno batok sa COVID-19.
Sa pikas bahin, ang assessment ni Multi-Sectoral Organization Focal Person Jess Pagaran, posibleng molungtad hangtud duha ka bulan una pa mag-abli ang mga kumpanya depende sa disiplina nga ipakita sa mga tawo.
Sumala ni Pagaran, kung walay ‘supply and demand,’ maglisod og kamas ang atong nasudnong ekonomiya ug kung naa ma’y supply apan ang mga tawo maglisod og palit og pagkaon, wala gihapo’y mahitabong pag-uswag sa atong kinatibuk-ang pang-ekonomiya.
Segun ni Pagaran, angay nang ikunsidera sa gobyerno ang pag-abli sa mga industriya apan sa hinay-hinay nga pamaagi aron ang minilyon ka mga Pilipino mahibalik na sa ilang trabaho aron dili na sila malisdan pa sa panginabuhi.
Sa punto nga limitado ug dili ka-sustiner og dugay ang ayuda sa kagamhanan alang sa iyang katawhan, mogawas nga dili maayo nga ihangad na lamang sa katawhan ang ilang panginahanglanon ngadto sa pag-alibyo sa kinabuhi sa tanan, dugang sa sectoral officer.
RadyoMaN Joel Viray
