Davao City – Wala na kauli nga buhi sa ilang panimalay ang usa ka 16 anyos nga dalaga gikan nagpa-load ug nakit-an na lamang ang patayng lawas niini nga nagbuy-od sa bagnutan sa may Prk. 10 Libby Road, Bago Gallera, Talomo District Davao City.
Sa interbyu sa DXDC Rmn Davao sa inahan sa biktima nga wala na makabalik iyang anak kinsa iyang gisugo nga magpa-load sa tindahan pasado alas 6 sa gabie.
“Nagpa-load lang siya kay gikalintura man gud iyang manghod nga babae unya iya lang untang tawagan ang iyahang papa kay padalhon unta’g tambal,” sumala niini.
Gisaysay sa inahan nga human sa pila ka oras nga pinangita, nakita sa iyang anak nga kinamaguwangang lalaki ang cellphone sa biktima sa kalsada dihang gisubay na usab nila ang maong luna nakita na nila ang biktima.
“Didto gyod na nila gipatay akong anak sa luyo anang balay, gialsa nalang siya sa akong anak nga kinamaguwangan dinhi sa duol. Dako kaayo sya’g lagom sa nawng. Giposposan tingali nila akong anak ba,” sumala sa inahan.
Base sa report sa Talomo PNP gituohang gilugos-patay ang biktima.
Matud sa mga kapulisan nakita sa igsuong lalaki sa biktima ang patayng lawas niini likod sa usa ka abandonadong balay nga nakabalot na og blue nga plastic cellophane sa saging.
Sumala sa mga awtoridad giingong nakita sa igsuon niini nga ang suot pangubos sa biktima hubo na kutob sa iyang tuhod.
“Victim sustained wounds and contusions in her body particularly in the head, believed to be after being hit with a hard object,” matud sa Talomo Police.
Matud sa kapulisan gidala sa Anghel Funeral Homes ang patayng lawas sa dalagita aron ipailawom kini sa awtopsiya.
Gipalawman karon sa mga awtoridad ang imbestigasyon sa maong panghitabo aron maidentipika ug madakpan ang responsable sa krimen.
Nanawagan karon ang inahan ngadto kang Pres. Rodrigo Duterte nga tabangan sila nga makab-ot ang hustisya.
RadyoMaN Aimee Guinita
