Dipolog City – Usa ka granada ang napalgan sa niaging adlaw alas 7:30 sa buntag didto sa Purok Makugihon Barangay Miputak dakbyan sa Dipolog.
Si PO3 Michael Cuenca ang Supervisor sa Police Outpost sa may Ramos Village uban sa pakigkutay ni SPO1 Joel Albufera, membro sa EOD/K9 team ang daling niresponde sa dapit human nadawat ang report nga usa ka MK2 fragmentation hand grenade napalgan sa usa ka batang lalaki siyete anyos, mulupyo sa dapit, diha sa may pathway paigon sa Brgy. Galas.
Sumala pa sa pag-imbestiga sa mga police officer ang maong granada gituhoan nabagbong sa agianan gikan sa posisyon sa wa pa mailang tawo nga lumalabay sa dapit kon diin napalgan sa bata.
Gikaigon pa nila nga aktibo pa ang maong granada nga posibleng moboto kon malangkat ang pin ug nagpasalamat sila nga wala kini dulai sa maong bata.
Ang maong eksplosibo gitugyan na sa kapolisan ngadto sa EOD officer alang na unya sa saktong disposisyon. (r.m)
