Roxas City, Capiz- Nagahimas sang malamig nga rehas sa Roxas City Police Station ang isa ka 21-anyos nga lalaki nga nagbuno sa GRO nga nagabaligya sang hingalit nga kalipay. Padayon nga ginabulong sa isa ka ospital sa syudad sang Roxas ang biktima matapos nag-angkon sang pilas sa nawala nga liog kag ilok. Ang nasambit nga GRO ginhinago gid lamang sa pangalan nga “Regine” sang Barangay Lawaan, Roxas City.
Suno sa panaysayon sang biktima, pasado alas dose na sang kaagahon sang nagligad nga adlaw sang Domingo sang ini ang gin-transaksyon sang suspek nga si “Elvin” 21-anyos sang Brgy. Yatingan, Pontevedra, Capiz. Una nga nagpresyo si “Regine” balor P1, 000 pesos, apang nag-ayo ang suspek kag nagkasugot na lang sa balor nga 350 pesos dala na ang bayad sa motel.
Ginpahayag dugang sang biktima nga nagkasugot sila sang suspek nga magsulod na sa motel nga nahamtang sa Pavia St. Brgy. IX. Sang ara na sa sulod sang motel nag-umpisa na ang hampang apang matapos ang pila ka minutos, wala gihapon nagtindog ang kargada sang suspek rasun nga nagreklamo si babye. Bangud natak-an si babaye sa paghulat kon anu oras matindog ang armas sang suspek, gintuyo sini nga maglakat nga amo naman ang rasun sang pag-init sang ulo ni Elvin kag ginsundan ini sang pagbuno sa babaye gamit ang 7 inches nga kutsilyo.
Nagpangayo sang bulig ang babaye kag natigayon naman nga nadakpan ang suspek sang nagresponde ang mga pomuluyo kag ginturn-over ini sa mga kapulisan. Magluwas kay Elvin nakastiguhan man ang amigo sini nga kaupod sa pagkuha sang babaye sa nasambit nga lugar. Nagapabilin naman sa karsel sang Roxas City Police Station ang suspek samtang narekober ang man ang kutsilyo nga nagahaba sang pito ka pulgadas.
Sa interview naman sang DYVR RMN Roxas sa suspek nga si Elvin, ginklaro sini nga indi matuod nga wala nagtindog ang iya armas. Suno diri nga masobra na sa 10 minutos ang ila bakbakanay sang GRO sa sulod sang motel. Nairita kag nangakig lamang ini sang nag-untat ang babaye nga wala pa ini nakalab-ot sa langit kag wala pa nakalupok ang iya armas.
Ginpahayag dugang sang suspek, nga nagtuyo sa paglakat ang babaye rasun nga nagdugang pa gid ang kaakig sini kag ginbuno ang biktima. Gin-ako man suspek nga ginbuno sini ang babaye bangud sa kaakig nga nagabayad man ini sang insakto apang ginbitin sang biktima. Ginpabugal pa ni Elvin nga may duha ka mga bolitas nga nakatanum sa iya kargada. Samtang ginahulat pa sang mga kapulisan ang desisyon sang biktima kun mapasaka ini sang kaso batuk sa suspek.
