CAPIZ – Guinpangunahan ni Governor Tony del Rosario ang Groundbreaking Ceremony para sa rehabilitation ukon ang pagpasemento sang Salgan- Batabat-East Villaflores sa banwa sang Maayon, Nobyembre 8.
Ang nasambit nga proyekto nga nagabalor sang 225 Milyones pesos ang may kahaba-on nga trese kilometros, may kalaparon nga saes punto uno metros kag may kadamulon nga dose pulgadas. Ang nasambit nga proyekto ang kabahin sang Kalsada Program sang Department of Interior ang Local Government (DILG) sa bulig sang Department of Budget and Management (DBM.)
Sa mensahe ni Governor Del Rosario, guinpahayag niya nga pinaagi sa nasambit nga proyekto nga pagpasemento sang nasambit nga dalan, mahatagan na sang sabat ang madugay na nga pag-antos sang pumoluyo sa kabudlay sang ila alagyan ilabi na sa pagdala sang ila mga produkto sa kabukiran padulong sa merkado.
Guinagangyat ni Governor del Rosario ang publiko nga sila mismo ang magabantay sa pagpaubra sang nasambit nga proyekto agud nga maseguro nga nagakasinanto ang specification sang karsada kag magadugay ini sang malawig nga panahon tubtob pa sa masunod nga henerasyon. Tuman naman ang pagpasalamat kag kalipay nga nabatyagan sang mga opsiyal kag pumoluyo sang tatlo ka nahinambitan nga banwa kay Governor del Rosario sa katumanan sang proyekto.
Nagtambong sa nasambit nga aktibidad sanday Mayor Wilfredo Pidot Borres, Vice Mayor Wildy Apolinario sang Maayon kag DILG OIC Asst. Regional Director kag Concurrent Provincial Director Ma.Calpiza Zardua.
(c) Capiz Aksyon News Center
