Davao City- Dili kumbensido ang Parents Mobilization Action Group sa bersyon sa kapulisan nga nalambigit ang grade 11 student nga Carl Arnaiz sa tulis sa taxi ug sa paghithit sa droga.
Dili motoo si PMAG Focal Person Febe Matthew nga makahimo og salaod si Arnaiz sama sa panulis mao nga napatay siya sa mga sakop sa Caloocan City Police.
Suma ni Matthew, sa pangidaron ug sa estado sa kinabuhi ni Arnaiz imposibli kaayo makahimo sa krimen ang batan-on kinsa kanhi tinun-an sa University of the Philippines.
Nasayran nahimong Valedictorian si Carl sa ilang tunghaan ug abroad sab ang inahan busa dakong sayop ang nakumitar sa kapulisan ngadto sa batan-on nga ilang gi-tortured una gipatay.
Nagduda si Matthew nga gigamit na lang nga alibi sa kapulisan ang ilang pasangil aron matabunan ang ilang sala sa pagpatay sa batan-on sa ingon ma-ipsutan ang ilang tulubagonon sa balaod.
Mipadayag og simpatiya ang Parents Mobilization Action Group sa pagbangutan sa mga ginikanan ni Carl uban sa pagtoo nga nagsulti sa tinood ang pamilya nga wala nag-apil-apil sa binuang biktima sukwahi sa pasangil sa mga otoridad.
Ang kamatayon nila Kian Delos Santos ug Carl Arnaiz buhing kamatooran nga adunay grupo buot magsa-sabotahi sa drug war sa kagamhanan karon pinaagi sa pagpalihok sa eskalawag nga mga pulis nga ilang kakunsabo, dugang ni Matthew.
Kasamang Joel Viray
