Binigyang-diin ng Government Service Insurance System (GSIS) nitong Miyerkules, November 19, ang malaking papel ng feedback ng mga miyembro sa pagpapatupad ng mga reporma sa ahensya sa ginanap na 2025 GSIS NCR Stakeholders’ Dialogue sa VS Hotel and Convention Center sa Quezon City.
Ayon kay GSIS President and General Manager Wick Veloso, ang direktang pakikipag-ugnayan sa mga miyembro ang nagsisilbing gabay sa patuloy na pagpapabuti ng serbisyo. “We are here to listen so we can better understand how to make your transactions with GSIS easier and more convenient. Every improvement you see started with someone speaking up in a dialogue like this one. Your feedback is the trigger for real change.”
Isa sa mga repormang kanyang binanggit ay ang pagtanggal ng down payment para sa mga miyembrong nais bilhin ang GSIS housing unit na kasalukuyan nilang inuupahan. “Your monthly rent will now be treated as part of your amortization. That change came from you.”
Malaking bahagi ng programa ay inilaan sa open forum kung saan nakapagtanong ang members at mga kinatawan ng ahensya ukol sa mga programa, polisiya sa pautang, usaping pensyon at digital na mga serbisyo ng GSIS. Direktang sinagot ng mga opisyal ng GSIS ang mga isyu, na binanggit na ang diyalogo ay nagbigay-daan sa ahensya upang makakuha ng pananaw tungkol sa mga pangangailangan at hamon ng stakeholders nito.
Nagbigay ng keynote message si UP Diliman Chancellor Edgardo Carlo L. Vistan II at pinuri ang GSIS sa pagsulong nito ng digital governance at modernisasyon. “Your theme, ‘Basta sama-sama, tuloy-tuloy ang ginhawa,’ is more than a slogan. It captures a truth that both GSIS and UP Diliman hold dear: that meaningful progress happens when institutions work together, when systems are aligned, and when public service is strengthened by shared purpose.”
Pinuri rin niya ang GSIS: “Your continued efforts to modernize member services, strengthen records management, and enhance digital security directly contribute to nation-building. You are preserving the dignity and welfare of millions of government workers and pensioners.”
Bahagi rin ng programa ang mga update sa digital innovation at fraud prevention. Tinalakay ni Scam Watch Pilipinas co-founder Jocel de Guzman ang tumataas na digital fraud incidents na tumatarget sa mga kawani ng gobyerno. Nagpakita rin ang GSIS ng mga bagong enhancement sa digital services at GSIS mobile app, kabilang ang mas pinahusay na security features at mas seamless na user experience.
Pinarangalan sa event ang mga ahensyang nagpakita ng mataas na loan at premium collection efficiency, mababang past due rate, at matibay na digital partnership. Kabilang sa mga awardee ang CHED Region IV B, UP System, Quirino Memorial Medical Center, House of Representatives, National Kidney and Transplant Institute, Philippine National Police, Anti Red Tape Authority, Public Attorney’s Office, National Housing Authority, DOTr MRT 3 at Commission on Audit.
Bilang representative ng mga awardees, nagpasalamat si Acting PNP Chief PLTGEN Jose Melencio C. Nartatez Jr. sa pagkilala ng GSIS sa top performing agencies. “These awards remind us that accountability and good governance matter and that public service improves when every agency does its part.” Dagdag pa niya, “You can be assured that we will continue to meet our responsibilities with discipline and integrity. This recognition strengthens our commitment to serve better, work smarter and uphold the trust given to us.”
Ayon kay Veloso, patuloy na magsasagawa ang GSIS ng mga dialogue sa iba’t ibang rehiyon upang mas mapatatag ang transparency at accountability. “Your insights guide our policy decisions and help us build a more effective and member focused GSIS.”
