TACLOBAN CITY – Ginpapalikayan han Department Of Energy (DOE) an publiko paggamit han 2.7 kilos tipa-ubos han Liquefied Petroleum Gas (LPG).
Sumala han abiso tikang ha DOE, delikado nga gamiton ini nga lpg ha sakob han panimalay kay magdudurot ini hin sunog.
Dako daw an pagkaka-iba han regular nga kadako han tangke nga 11 kilos ha gudti nga tangke han LPG kay an gudti nga tangke waray regulator.
Abiso pa han DOE ha publiko nga kinahanglan kitaon han mga konsumer an lpg nga ginpalit kun mayada marka nga ICC o Import Commodity Clearance nga nagpapakita nga gin-aprubahan han Dept. of Trade and Industry (DTI)
Pagklaro han ahensya nga diri nira igpiphase-out an mga gagmay nga tangke ha merkado kay pwede ini magamit ha iba nga kagaramitan basta diri la ha sakob han panimalay.
