Davao City – Gihangyo sa Parents Mobilization Action Group (PMAG) ang mga magtiayon nga ipatigbabaw ang pagminahalay sa matag-usa aron dili musangko sa panagbulag ang panagbingkil sa ilang relasyon.
Gi-aghat ni PMAG focal person Febe Matthew ang mga mag-asawa nga ipatigbabaw ang paghigugmaay ug dili ang kasuko aron kun mag-away man dili musantop sa pagputol sa kaminyoon ug panagbulag.
Nasuta sa pagtoon sa grupong PMAG nga sagad awayan sa magtiayon mao ang sapi ug kakuwang sa oras dala na sa ka-busy sa trabaho busa wala nay panahon sa pag-istorya pag-uli sa balay tungod kay mag-diretso na og katulog gumikan sa kakapoy.
Gidasig ni Matthew ang kadtong magtiayon nga dunay ingon ani nga sitwasyon sa ilang kaminyoon mas maayo nga makigkita og batid nga magtatambag sama sa mga pastors ug mga Christian counselors aron masulbad ang problema nga dili na kilangan pa muabot sa panagbulag.
Samtang giduso ni Matthew ang paghigugmaay ug pagsinabtanay sa mag-asawa apan hugot usab ani gisugyot ngadto sa magtiayon nga dili na kaya takdoon ang ilang pagsinabtanay ug wala nay kalipay ang ilang pamuyo mag-divorce na lamang sila aron mahatagan og kahigayon ang ilang mga kaugalingon nga malipay uban sa laing binuhat.
Giklaro sa focal person sa kahugpungan sa mga ginikanan nga uyon kini sa divorce bill apan supak kini sa absolute divorce bill sa katarungan nga puwede pa man ayuhon ang nahugmak na nga tulay sa maayo nga relasyon ug kaminyoon sa mga magtiayon.
RadyoMaN Joel Viray
