Nilanat og duha ka oras ang nahimong negosasyon sa mga awtoridad ngadto sa usa ka lalaki nga gustong moambak gikan sa 11th floor sa LUYM building sa Cebu City human giingong labihan kining naguol kay nabuwagan sa iyang uyab .
Ang maong lalaki nailhan sa pangan nga si Damaso Wenceslao Jr., taga Tisa Labangon sa syudad sa sugbo, 25-anyos ug usa ka bagger sa usa ka tindahan sa mga Taiwanese sa dalan Manalili sa dakbayan .
Niasoy ang higala ug kauban sa trabaho ni Wenceslao nga si Teodolo Mayla nga nag-inom pa sila alas 8:00 sa buntag apan nakalitan nalang kini dihang pag-alas 3:00 sa hapon nisaka nalang sa 11th floor ang iyang amigo .
Nitug-an sab si Mayla nga labihang naguol si Wenceslao tungod kay gibuwagan siya sa iyang hinigugma ug nasayran pa niini nga kauban ra sab sa trabaho sa lalaki ang laing na-uyab sa babaye nga nibuwag niya .
Ang mga sakop sa Bureau of Fire Protection kun BFP-7 uban ang pipila ka mga sakop sa kapulisan, ang iyang higala nga si Mayla, ug mismo ang kanhi hinigugma niya ang nisuway pagnegotiate kang Wenceslao aron mokanaug kini gikan sa taas nga ang-ang sa maong building .
Gidala sa duol nga tambalanan si Wenceslao human nikanaug na kini gikan sa 11th floor sa naasoy’ng building human sa duha ka oras nga negosasyon .
