Davao City – Dili pinaagi sa aplikasyon kundili pinaagi sa pag assess mismo sa Department of Social Welfare and Development (DSWD) ang pagkahimong benepisyaryo sa Pantawid Pamilyang Pilipino Program (4Ps).
Sumala pa ni Merlinda A. Paragamac, Promotive Services Division Chief sa DSWD-XI, adunay Standard Targeting System ang departamento diin ilang ma-identify ang mga beneficiaries pinaagi sa house to house assessment or survey.
Sa maong survey, dili pa usab kasigurohan nga maapil na kini sa programa kundili sa maong listahan, aduna pay criteria o guidelines nga tan-awon aron kadto lamang deserving beneficiaries ang mahilakip niini.
Pipila sa maong mga criteria mao ang kadtong mga kabus nga nagbaton og 0-18 years old nga anak ug adunay nagsabak nga kabanay atol sa pagpahigayon sa assessment. Kinahanglan usab nga ma-categorize ang pamilya sa kadtong wala nakaabot sa provincial poverty threshold. Nasayran nga dili income ang mahimong basehan sa DSWD aron mahimong miyembro sa 4Ps.
“We don’t use the income indicator. Ang gihimo nato ang proxy variable o ang mga kabtangan, kadtong makita during the inteview. Naa bay aircon ang panimalay, naa bay kotse, naa bay motor, naay refrigerator. Unsang klase ang bobong. Unsang klase ilang balay gyud, sementado ba,” saysay ni Paragamac
Gi-desenyo ang 4Ps sa pagtabang sa gikonsiderang “poorest of the poor” sa nasud subay sa mismong assessment sa DSWD.
Nasayran nga sukad sa pagsugod sa 4Ps niadtong 2008, aduna na kini na serbisyohang 4,876,394 poor households sa tibuok nasud as of February 28, 2019.
RadyoMaN Kirby Manzon
