![closed](https://i0.wp.com/rmn.ph/wp-content/uploads/2018/04/closed.jpg?resize=337%2C337&ssl=1)
Boracay- Nagpaguwa na ang mga otoridad sang general guidelines natuhoy sa pagpasira sang Isla sang Boracay umpisa sa Abril 26.
Ang guidelines kabahin sang inter-agency contingency plan sang Regional Peace and Order Council ukon RPOC 6 .
Yari ang mga pagsulundan nga igapatuman sa tion nga masiraduhan na ang Boracay para sa rehabilitasyon:
Sa Jetty port pa lang, punggan na ang mga turista nga tuyo magsulod sa isla.
Makasulod lamang ang mga pumuluyo, trabahador ukon resort owner sa Boracay kon may ID sila nga may specific address sa tatlo ka brgy sa isla.
Pagadumilian ang pagpaligo sa baybay sa Boracay magluwas lamang sa mga pumuluyo apang limitado lang halin alas 6:00 sa aga tubtob alas 5:00 sa hapon kag sa Angol Beach lang sa Station 3.
Pagadilian man nga makasulod sa isla ang mga bisita sang mga pumuluyo sa Boracay magluwas sa emergency situations apang kinahanglan sang clearance sang security committee nga ginabugusan sang representante sang Department of the interior and Local Government, Philippine National Police kag sang Local Government Unit.
Kinahanglan man nga i-revalidate sang Bureau of Immigration ang mga foreign residents.
Pahanugutan naman nga makasulod sa Isla ang mga katapo sang media apang dapat may approval sang Department of Tourism.
Ang mga floating structures ang indi naman pagpahanugutan sa sulod sang 15 kilometros halin sa higad sang baybay kag Ang Cavan Port lang ang mangin entry kag exit point sa nasambit nga isla.