May bag-o na nga Provincial Director ang Guimaras Provincial Police Office matapos gin-relieve si Police Col. Julio Gustilo bangud masobra na ini duha ka tuig sa puwesto.
Gintal-os sa Puwesto ni Gustilo sa GPPO si Police Col. Esmeraldo Palomaria Osia Jr. base sa special orders number 2019-446 nga ginpapanaug sang Campo Crame.
Si Gustilo ang naghingyo sang reassignment para sa iya career advancement kag igapahamtang naman sa Aviation Security Group sa Campo Crame .
Temporaryo lamang si Osia sa Guimaras Provincial Police Office bangud ginpahayag ni PRO-6 Director Brigadier General John Bulalacao nga pagkatapos sang eleksyon, pagabalasahon naman ang mga opisyal sang Pulis kon sa diin si Osia ang iga-assign sa Aklan Provincial Police Office agud magbulos kay Police Col. Lope Manlapaz.
Si Manlapaz naman ang igasaylo sa Guimaras Provincial Police Office bangud masobra naman ini duha ka tuig sa Aklan Provincial Police Office.
