GUINDAYAW | Maayo nga performance sang Capiz PNP, guindayaw ni Governor Antonio del Rosario

131

CAPIZ – Guindayaw ni Governor Tony del Rosario ang maayo nga performance sang kapulisan sa probinsya sang Capiz sa nakaligad nga tuig 2017.
Sa guinpatigayon nga New Years Call sang mga hepe sang 16 ka kabanwahanan , syudad sang Roxas kag mga pinuno sang nagkatuhay nga dibisyon sang Capiz Police Provincial Office sa pagpanguna ni PSSUPT. Samuel Nacion, guinkilala sang Gobernador ang pagtinguha sang kapulisan sa pagmentinar sang kalinong kag katawhay subongman pagtapna sang krimen.
Apisar sang pagtaas sang populasyon talalupangdon suno kay Governor Tony ang guinhimu sang kapulisan sa pagpanubo sang krimen sa Capiz nga guinalauman niya nga magpadayon subong nga 2018.
Nag-apelar ini sa kapulisan nga himuon ang tanan sa pag zero-in sang ilegal nga druga kag buligan siya sa implementasyon sang mga environmental policy sang probinsya.
Guinpasalig man ni Governor Tony nga suportado niya ang tanan nga tikang sang kapulisan para sa katawhayan sang Capiz.
(c) Capiz Aksyon News Center

Facebook Comments