Kahinumdoman, gibakwi sa Police Regional Office 11 ang Permit to Carry Firearms Outside of Residence gikan Marso 20 hangtud sa 31 karong tuiga hatud sa Alveo Triathlon race nga giapilan sa mga langyaw ug sa mga local nga mga cyclist sa kalibutan.
Una nang gipasabot ni Davao City Police Spokesperson Police Major Catherine Dela Rey ngadto sa mga nanag-iya og baril nga dili dalaon ang ilang mga kargada kung mugawas sila sa ilang mga panimalay aron dili sila dakpon og makasohan nunot sa gun ban nga gi-imposar sa rehiyon onse.
Ug bugtong kapulisan ug kasundalohan lamang ang gitugotan nga magdala og ilang mga service firearms, apan ang mga sibilyan gidid-an gumikan sa gipatuman nga gun ban ning kasamtangang buwan.
Gipasabot ni Dela Rey nganong magpatuman og gun ban sa rehiyon kini aron walay mahitabo pinusilay atol sa triathlon race nga nahuman na kagahapon adlawa.
Gisulti pa sa tigpamaba nga kadtong nanag-iya og armas unya nakadala sa ilang mga pistola, mas maayo pang mubalik nalang sa ilang agi o dili ba kaha ibilin sa mga checkpoints nga gimuntar sa kapulisan aron dili mabutang sa alanganin ugali dunay mga otoridad manita ngadto kanila.
Sa kinatibuk-an, nagmalinawon ug walay mga dagkong panghitabo natala ang kapulisan sa rehiyon sa baguhay lamang nahuman nga Alveo Ironman 70.3 Triathlon Race kagahapon adlawa.
RadyoMaN Joel Viray
