Davao City – Karong bulana, hingpit nang mahuman ang pagpailawom sa Mindanao sa balaud-militar kun martial law human sa duha ka tuig nga pagpatuman niini dinhi sa habagatan.
Apan ang Konseho ning syudad nagduso karon og resolusyon nga magdili sa katawhan dinhi nga makabaton sa ‘Permit to Carry Firearms Outside Residence.’
Matud ni First District Councilor Mabel Sunga-Acosta, Committee on Peace and Order Chairperson, subay lamang kini sa kagustohan sa mga awtoridad denheng dapita.
Gitin-aw ni Acosta nga molungtad lamang og usa ka tuig ang dili pagtugot sa mga sibilyan nga magbaton og armas diin human niini, katugtan na silang magproseso pag-usab sa ilang applications.
Sa laktod, bisan og mahuman na ang martial law sa Mindanao, dili gihapon puwedeng magbitbit og armas ang mga sibilyan gawas sa ilang mga balay kay sikupon ug kasohan gihapon sila sa mga awtoridad.
Dugang sa konsehala nga apil ang mga taga-laing lugar nga did-ang magdala-dala og armas bisan pa og may dala silang lisensiya kung musulod ug mag-estar sila dinhi sa dakbayan.
Gidasig ni Acosta nga kutob sa adunay hulga sa kinabuhi, pwedeng mo-apply sa nasudnong kapulisan og police escort aron maoy mo-protehir kanila gikan sa mga dautang tawo.
Masaligon si Acosta nga mamentar sa kapulisan ug Task Force Davao ang kahapsay ug kalinaw maingon man ang seguridad ilabi na nga nakahan-ay na ang mga aktibidades sa ‘Pasko Fiesta’ karong bulana dinhi sa Davao.
RadyoMan Joel Viray
