Davao City – Gitumbok nga ‘cultural’ ang dakung kawsa o hinungdan kun nganong ang tawo magbitbit man gayud ug armas de fuego diin dili lamang alang sa pagpaneguro sa seguridad kon dili silbing simbolo usab sa poder kun gahum.
Kini maoy analysis karon ni Dr. Adrian Tamayo, executive director sa Institute of Popular Opinion (IPO), research arm sa University of Mindanao sa isyung ‘Gun Ban Revisited’ nga gituki sa numero unong radio social commentary program nga ‘Straight to the Point’ sa DXDC 621 RMN Davao.
Segun kang Tamayo, kabahin sa kulturang Pinoy nga gawas sa mga lideres-pulitikal, aduna usay pinasahi nga hut-ong sa mga tawong gitawag nga ‘bagani’ kun mga ‘warriors’ nga maoy tigpanalipod sa usaka komunidad.
Kun buot natong rendahan ang gun proliferation ilabi na sa mga unlicensed loose firearms, nan angayang usbon nato ang nahimo nang batasan diin ang armas tipik ug kabahin sa inadlaw-adlaw’ng kinabuhi sa usaka barangay.
Gani, bisan sa mga komunidad sa atong mga kaigsoonang Muslim, nahimo nang daw stereotype nga taas ang pagtratar sa mga kalalakin-an sa bili sa armas tupad sa ilang mga propyedad ug bisan na sa pamilya.
Gawas usab niana, matud sa propesor, anaa pa ang isyung gun ownership diin inay nga batonan ang doktrinang ‘responsible gun ownership,’ nahimo na man hinoong cover ang armas alang sa pagpasakit sa ubang tawo.
Kagahapon, gitugaw ang Las Vegas Nevada sa Estados Unidos sa dihang nahitabo ang mass shooting incident atol sa usaka country concert diin kapin 50 nakabsan sa kinabuhi ug sobra 500 usab ang nanga-angol.
Ang Las Vegas incident nisunod sa lain pang terror attack didtong dapita sa Edmonton, Alberta, Canada gumikan lamang sa usaka butang o realidad: Ang gawasnon kon libreng pagtenir sa tawo sa mga hinagiban ubos sa gitawag nga ‘constitutional right to bear arms’ alang sa pagdepensa sa kaugalingon.
RadyoMan June Duterte
