Nagapabilin nga at large ang security guard nga nagluthang patay sa construction worker sa Barangay Pandac, Pavia sang nakaligad nga Sabado sang gab-i (Marso 30).
Nahibaluan nga nagpalagyo ang suspek nga si Melchor Agbalog Jr. matapos ginluthang ang biktima nga si Leonel Leysa, 31 sang Barangay Toyungan, Calinog, Iloilo.
Base sa imbestigasyon sang Pavia PNP, natabu ang insidente matapos nagbaisay ang duha sa ila boarding house kon sa diin hinali na lamang nga ginluthang ni Agbalog si Leysa sang makapila ka beses kon sa diin nakaagum ang biktima sang kapilasan sa agtang, nawong kag dulunggan.
Gilayon naman nga gindala sa ospital ang biktima apang gindeklarar nga dead on arrival.
Magluwas kay Agbalog, ginapangita man sang kapulisan ang kaupod sini nga guwardiya nga si security guard Raymart Sarento nga gin-alegar kahimbon sini sa paghimu sang nasambit nga krimen.
