General Santos City—ospital ang gidangatan sa usa ka gwardya human gibunalan ug gidunggab sa sama niining gwardya alas 8:00 sa gabie niadtong nakalabayng adlaw sa Zone 2-C, Barangay Bula Gensan.
Biktima giilang si John Rey Ringo, 27, residenti sa Zone 2-C, Barangay Bula, samtang ang suspek giilang si James Manabay, 26, residenti sa samang lugar.
Subay sa report nag inum ang mga nasangpit sa maong lugar, samtang nag-inum nalingaw matod pa ug txt-txt ang biktima, nakurat nalang kini dihang kalit lang kining gibunalan sa suspek ug botelya ug dihang nabuak, iya pa kining gidunggab hinungdan nga nakaangkon ug samad.
Gigukod pa sa suspek ang biktima apan kini hingpit nakalingkawas sa kamot sa suspek, pila ka gutlo ang nakalabay, nagpabuto pag pusil ang suspetsado sa lugar. Alas 11:00 na sa gabie dihang mireport sa kapulisan ang biktima nga gilayon man girespondihan sa tropa sa Police Station 6.
Malampusong nasikop ang suspetsadong gwardya ug anaa na karon balhog sa silda sa Police Station 6.
