Iligan City – Blangko pa ang kapulisan sa presinto uno kun si kinsa ang suspect sa mipusil patay sa habal-habal driver alas kwatro ganinang kadlawon sa Purok 2A barangay Luinab.
Giila ang biktima nga si Marlon Echavez, 52 anyos, menyo ug taga purok 3 barangay Santiago.
Subay sa gihimong imbestigasyon sa kapulisan ug sa SOCO naabtan nilang wala nay kinabuhi ang biktima sa crime scene kun asa naka-angkon kini ug samad pinusilan sa iyang ulo nga maoy hinungdan sa iyang hinanaling kamatayon.
Gibutyag sa anak sa biktima nga si Leomar Echavez nga wala silay nahibal-ang kaaway sa ilang amahan ug normal lang nga isip habal-habal driver sayo kining mobiya sa ilang balay aron sa pagpamasahero.
Narecover sa posisyon sa biktima sa lugar kun asa siya gipusil ang nagkalain-laing ID, stab sa swertres, cellphone, iyang motor ingon man cartridge o basyo sa bala sa 45 kalibre nga pistola nga maoy gigamit sa pagpusil ngadto kaniya.
Nagpadayon pa ang gihimong imbestigasyon sa kapulisan labot sa nasangpit nga panghitabo. (Ghiner L. Cabanday, RMN-DXIC Iligan)
