Davao City – Naningkamot karon ang Committee on Transportation sa hawanan sa Konseho matabangan nga ma-legalisar ang pamasahero sa mga habal-habal ug sa mga motorcycles-for-hire dinhi sa siyudad sa dabaw.
Sumala ni Third District Councilor Conrado Baluran nga andam hatagan og konsiderasyon ang habal-habal sa kondisyon nga kilid sa kalsada lang sila manubay ug dili tunga sa highway aron dili madisgrasya.
Ang proposed legislation anaa na kini karon sa hawanan sa Kongreso sa Pilipinas.
Gani, ang komitiba sa transportasyon mitagad sa pagpangayo og tabang sa mga habal-habal drivers aron mapangitaan og konsiderasyon ang ilang panginabuhian sa pamasahero.
Gilayon naglusad og committee hearing ang maong komitiba diin na-imbitihan kaniadto ang LTO, LTFRB, transport sector ug uban pa aron paminawon ang matag punto sa pag-legalisar sa habal-habal operations.
Dugang ni Baluran nga malisud ang hangyo sa mga habal-habal nunot sa kapi-ot sa mga dalan karon ug sa mga disgrasya nga involved ang single motorcycles.
Apan bisan paman niini, puwede gihapon mapangitaan og pamaagi ang pag-legal sa habal-habal sa ingon dili mawad-an og panginabuhi ang mga drivers nga nagsalig lamang sa ilang panginabuhi diha sa pamasada.
Pero dili pa makasiguro si Baluran hangtud kanus-a maghuwat ang mga drivers nga matugtan ang ilang pagpamaneho diha sa mga highways depende na lamang unya sa development sa hawanan sa Kongreso diin pending karon ang maong sugyot-balaudnon.
RadyoMaN Joel Viray
