Davao City – Subling gitindogan karon sa Commission On Election (COMELEC) Davao City nga dili na nila trabaho ang pagsunod og tanggal sa mga campaign materials sama sa posters, tarpaulin ug uban nga gipamilit sa mga kandidato sa nakalabay nga kampanya sa bag-ohay nahuman nga 2019 midterm election.
Gipalanog karon ni First District Election Officer Atty.Krishna Samantha Caballero nga dili obligasyon sa ilang buhatan apan responsibilidad sa mga kandidato ang paglimpyo sa mga basura nga ilang gipangkatag sa tibuok siyudad sa miaging piniliay.
Matud ni Caballero, dili usab hinoon nila mapugos ug makasuhan ang mga pulitiko nga dili mananggal og campaign materials sanglit walay existing nga balaud sa eleksyon sa Pilipinas ang magsilot panahon nga mapakyas sila sa paghakot sa ilang mga basura.
Ang konsensiya na lang ang nabiling paglaum sa buhatan aron mulihok ang mga pulitiko sa paghakwat sa ilang mga basura nga nagkatag sa dakbayan sa Dabaw, dugang batbat ni Caballero.
Hinoon base sa monitoring, daghan nang barangay sa siyudad hingpit nang nahinloan ug gani muabot na sa unom ka truck sa mga campaign materials ang nakolekta sa City Environment and Natural Resources Office (CENRO).
RadyoMaN Joel Viray
