Pasado na sa ikatatlo kag ulihi nga pagbasa sang Kamara ang hagna nga
naga-postpone sang Barangay kag Sangguniang Kabataan Elections sa bulan
sang Mayo.
Sa boto nga 164 ka yes kag 27 ka no, napasar sa plenaryo ang House Bill No.
7378 nga tinutuyo nga isulon ang nasambit nga eleksyon sa Mayo 14 pakadto
sa ikaduha nga Lunes sang Oktubre sa sini nga tuig.
Suno sa hagna, ipatuman ang hold over capacity sa mga incumbent officials
asta nga mabayluhan sila sang mga bag-o nga opisyales.
Target man ini nga idungan sa posible nga plebesito sa hagna nga
pag-amyenda sang saligang batas.
Una na nga ginpahayag sang pila ka mga senador nga apisar mabatunan nila
subong nga semana ang hagna, kulang na sila sa oras bangud asta bwas na
lang, Miyerkules ang sesyon antes ang lenten break.
Magabalik ang mga mamalidha sa bulan na sang Mayo. – RCSG/iFM News
