Hagonoy MPS ginapangita na ang inahan sa batang nakit-an sa kanal

Davao City – Padayon karon ginasubay sa kapulisan sa Hagonoy, Davao del Sur ang matag barangay pagsuta kung kinsa ang responsable sa pagbilin sa bag-ong himugso nga batang lalaki nga nakit-ang wala nay kinabuhi nga naglutaw sa kanal sa Purok 8, Barangay Poblacion, Hagonoy niadtong Pebrero 8, 2023.

Sa interbyu sa DXDC RMN Davao kang Police Corporal Jamaica Tanelon, personahe sa Hagonoy Municipal Police Station (MPS), gisulti niini nga posibleng mag-atubang ang inahan og kasong Infanticide tungod sa maong insidente.

“Naga-conduct gihapon og investigation ang amoang WCD (Women Children’s Desk) together with the investigator. Nagakuha pa sila’g information sa mga BHW (Barangay Health Worker) para makuha nila (ang datos) kung kinsa ang expected nga manganakay karon nga month,” segun ni Tanelon.

Panawagan sa pulis labi na sa mga inahan nga kung aduna may sitwasyon nga dili kayang mabuhi ang anak o sa unsa mang rason, mamahimong makig-alayon sa Department of Social Welfare and Development (DSWD) aron mahimoan og pamaagi nga luwas nga maatiman ang bata o legal nga mapa-adopt.

RadyoMaN Kirby Manzon