Ligtas na nakauwi sa bansa ngayong araw ang 191 Pilipinong biktima ng human trafficking mula sa Cambodia.
Sakay ng isang chartered flight, dumating sa NAIA Terminal 1 sa Pasay City ang mga naturang Pinoy.
Personal silang sinalubong ng Department of Migrant Workers (DMW) sa pangunguna ni Secretary Hans Leo J. Cacdac, kasama ang mga opisyal ng isang whole-of-government team.
Tiniyak ng pamahalaan ang agarang tulong at sapat na suporta sa mga repatriate, alinsunod sa direktiba ni Pangulong Ferdinand R. Marcos Jr.
Kabilang sa mga ahensiyang tumulong at sumalubong sa mga repatriate ang DMW, Overseas Workers Welfare Administration (OWWA), Department of Social Welfare and Development (DSWD), Department of Foreign Affairs (DFA), Department of Health (DOH), Presidential Anti-Organized Crime Commission (PAOCC), Department of Justice (DOJ), Bureau of Immigration (BI), PNP–Women and Children Protection Center, PNP–Anti-Cybercrime Group, National Bureau of Investigation (NBI)–International Airport Investigation Division, at NBI–Human Trafficking Division.
Nagpaabot din ng tulong ang mga international at non-government partners gaya ng International Organization for Migration (IOM) at Blas F. Ople Policy Center.
Sasailalim ang mga biktima sa medical check-up, psychosocial support, legal assistance, at reintegration programs bilang bahagi ng patuloy na kampanya ng pamahalaan laban sa human trafficking at sa pangangalaga sa kapakanan ng mga overseas Filipino.
