Naglab-ot sa 36,860 ka mga eskwelahan sa bilog nga Pilipinas ang paga-gamiton bilang polling centers sa maabot nga Lunes, Mayo 13, adlaw sang eleksyon.
Sa press conference nga ginpangunahan sang Department of Education (DepEd) kaina sang aga, ginpahayag ni Sec. Leonor Briones nga 531,307 ka mga officials, teachers kag iban pa nga mga personnel ang natalana nga maga-serbe sini nga pinili-ay.
Dugang pa sang DepEd nga ang Commission on Elections (COMELEC) na ang may obligasyon sa pagproseso kag pagpanghatag sang honoraria kag allowances sa mga manunudlo.
Sandig sa Republic Act 10756 ukon ang Election Service Reform Act, magabaton ang isa ka chairperson sang P6,000 nga honoraria kag P1,000 nga travel allowance.
Sa bahin naman sang member, magabaton ang mga ini sang P5,000 nga honoraria kag P1,000 nga travel allowance.
Makabaton naman sang P4,000 nga honoraria ang isa ka DepEd Supervisor Official (DESO) dugang pa ang P1,000 nga travel allowance.
Sa mga support staff, makabaton sila sang P2,000 nga honoraria kag P1,000 nga travel allowance.
Ang mga DESO Technical Support Staff ang sarang makabaton sang P2,000 nga honoraria, P1,000 nga travel allowance kag dugang pa nga P1,000 bilang communication allowance. /IFM NEWSROOM/RCSG
