Nakumpiska ang halos tunga sa million ka pesos nga balor sa iligal nga druga nga gituhoang shabu sa mga operatiba sa RDEU-10. Kini gikan sa usa ka 34 anyos nga tambay atol sa ilang anti illegal drug buy bust operation nga gilusad diha sa 9th-22nd Sts., Brgy. Nazareth ning siyudad.
Matud pa sa otoridad, napalitan sa usa ka sachet sa gituhoang shabu balor 1, 000 pesos ang suspek nga maoy hinungdan sa pagka-aresto ni-ini. Naila ang suspetsado nga 34 anyos, Jovito Abadies alyas “Dodong”, ulitawo nga tambay nga taga Macasandig ning syudad.
Dugang nakumpiska gikan sa maong suspek ang laing upat ka mga dagkong sachet sa gituhoang shabu. Gibana-bana kining motimbang sa kapin kon kulang 70 grams nga dunay estimated street value nga 476,000 pesos.
Sa pagkakaron detinado na sa Maharlika Detention Cell ang nasangpit nga suspetsado. Samtang kasong paglapas sa R.A. 9165 ang gihikay na alang sa pagpasang-at sa korte batok kang alyas Dodong.
