Roxas City, Capiz- Nakahanda na ang pwersa nga nagabug-os sa ‘Taskforce Capiztahan”. Ini matapos ang ginpatigayon nga final briefing kag inspection kahapon nga adlaw sa Villareal Stadium.
Suno kay CPPO Provincial Director S/Supt. Samuel Nacion, ginabug-osan sang kapin 1, 580 ka mga contingents ang Taskforce Capiztahan nga ginalakipan sang mga kapulisan sang Capiz PPO, Philippine Army, Philippine Coastguard, responding units halin sa local MDRRMOs, CERT, BFP kag iban pa.
Ang mga ini ang gintunga sa tatlo ka mga sub-taskgroup partikular ang Security nga pamunoan ni Supt. Ferdinand Dordas; Peace and Order nga pamunoan ni Roxas City PNP Chief of Police Supt. Dante Tayco kag emergency preparedness and response sub-taskgroup nga pamunoan naman ni PDRRMO Action Officer Mr. Speed Pelaez.
Suno sa iya may yara sang bastante nga pwersa ang iga-deploy para sa Capiztahan 2018.
Hugot man nga igabawal ang pagdala sang mga bladed kag pointed objects kaangay sang kutsilyo.
Subong man ginsuspender ang permit to carry sang lisensyado nga armasluthang halin sa Abril 13 tubtob15.
Igapatigayon man sang mga kapulisan ang serye sang mga checkpoints sa entrance kag exit point sang syudad.
Maluwas diri, may yara man sang mga force multipliers nga magabulig para sa pagmintenar sang kalinong samtang ginapatigayon ang mga aktibidades.
**(photo: AksyonTabang PDRRMO-Capiz)**
