Handa na ang Police Regional Office 6 para sa pagahiwaton nga State of the Nation Address ukon SONA ni Presidente Rodrigo Duterte sa Lunes nga adlaw.
Kahapon nga adlaw, gin-activate na sang Police Regional Office 6 ang Security task group SONA 2018 sa Western Visayas nga pagapamunuan mismo ni PRO-6 Director chief Supt. John Bulalacao.
Katuyuan sang security task group SONA 2018 nga masiguro nga malinong kag matawhay ang rehiyon samtang nagapalayag sang SONA si Pangulong Duterte sa Lunes, Hulyo 23.
Ginalauman sang PRO-6 nga magalunsar sang protesta ang pila ka mga cause oriented groups sa rehiyon.
Bangud sini, naka-standby ang civil disturbance management contingents sa tanan nga Police offices para sa posible gamo nga magaluntad.
Bilang kabahin sang pagpanghansa sa SONA, magahiwat man sang random Checkpoint operations ang kapulisan sa bug-os nga rehiyon.
