Mambusao, Capiz – Nakagwa na sa ospital ang masobra sa napulo ka mga persona nga gindapatan sang pagbulong, matapos mahulog sa hanging bridge sa sa Barangay Pang-pang Norte, Mambusao, Capiz kahapon sang aga.
Suno kay Punong Barangay Rodolfo Lunas, magakumpanyar kun tani ang mga biktima sa patay, apang sang nag-agi ang mga ini hanging bridge nagtakilid ang nasambit nga tulay.
Bangud sa kadamuon kag kabug-at sang mga nagatabok nadulaan sang balance kag nautod ang isa ka kable nga gintunaan sang pagtakilid sang hanging bridge. Kapin sa 30 ka mga persona ang nahulog sa suba kun sa diin masobra sa napulo diri ang nag-angkon sang mga pilas sa lawas.
Ang iban sa mga biktima, naka-inom sang tubig kag nakabatyag sang kahalok kag kakulba. Maswerte naman nga nakatabok una ang patay antes nagtakilid ang nasambit nga tulay.
Madasig naman nga nagpatigayon sang rescue operations ang Mambusao MDRRMO, PNP, BFP at PDRRMC agud masalbar ang mga biktima. Wala sang may napatay sa nasambit nga insidente.
Samtang ginpasalig ni Mambusao Mayor Leodegario Labao nga igapakay-o sini ang nawasak nga hanging bridge, bangud ini lamang ang nagapanguna nga alagyan sang mga residente sang Barangay Pang-pang Norte patabuk sa suba, pakadto sa banwa.
Nahibaluan nga daan na katama ang nasambit nga tulay kun sa diin gintukod ini sadtong tuig 1988.
