Davao City – Subli na usab nga gipamatud-an sa mga Pilipino ang kinaiya sa pagkamalipayon sa mata sa pangkalibutanong komunidad human naapil ang nasud sa mga area nga giilang malipayon karong tuiga.
Subay sa report sa United Nations (UN) 2019 World Happiness Report, nasungkit sa Pilipinas ang Rank 69th ‘Happiest Country’ ug mas mi-improbar itandi sa miaging tuig nga anaa lamang kita sa Rank 71st.
Ang UN migamit og unom ka basehan sa pagpili sa 156 ka nasud aron malakip sa listahan sa malipayon nga mga nasud kini mao ang Income, Healthy Life Expectancy, Social Support, Freedom, Trust, ug Generosity.
Ug tataw nga ang maong mga kwalipikasyon natuman sa nasud-Pilipinas.
Gumikan niini, wala mapunggi ni Third District Councilor Joselle Dilig-Villafuerte ang iyang kalipay sa padayon pag-apil sa Pilipinas sa mga malipayong nasud entero kalibutan karong tuiga.
Nagpamatuod lang nga ang mga Pilipino kaya mukatawa ug mubarog luyo sa mga pagsulay diin napamatud-an na kini sa daghang panahon dihang milampornas ang kalamidad sama sa bagyo sa atong nasud.
Sumala ni Villafuerte, ang lig-on nga pundasyon sa pamilya ug ang pagka-family-oriented- sa mga Pilipino maoy naghatag og kusog aron malipay bisan pa og makasinati og delubyo ang ilang pamuyo.
Bisan og namatyan man o walay salapi o kun gigutom, makahimo gihapon sa pagpahiyum ang mga Pilipino uban ang paglaum nga puwedeng ugmaron ang kinabuhi aron makabangon gikan sa pagkalukapa sa mga emerhensiya o kalamidad.
Adunay ubang pamilya nagkadiin-diin na og pangita og dapit aron makatulog ug maka-diskanso panahon sa kagabhion apan ang ilang pag-inunungay isip pamilya mao gayuy gitudlo nga dakung rason sa padayong kalig-on sa banay.
Sa kalipay ug sa kasakit man, bugtong ang kamatayon lamang ang makabugto sa pamilyang Pilipino nunca ang suliran ug wala’g tuo nga mga problema.
Daghan ang wala masayud kung asa nagsumikad ang pagkamalipayon sa mga Pilipino isip kabahin sa kostumbre, tradisyon ug kultura nga gitudlo pa sa mga katigulangan.
Sa pagtoon ni Dr. Shiela Marie Hocson, President sa Philippine Guidance and Counseling Association, siya nag-ingon nga adunay duha ka dakung tinubdan sa pagkamalipayon sa mga Pilipino.
Kini mao ang Pagkaon ug Pagtoo.
Matud ni Hocson, ang pagkaon mahinungdang aspeto sa mga Pilipino diin dinha migula ang panultihon nga pagkaon ra’y wala sa mga Pinoy nga iladong palakaon kun food lover.
Kabahin na sa kinaiya sa mga Pilipino ang pagpangagda sa mga bisita diin kay dinha mapakita ang kostumbre sa pagkamalipayon nga wala sa ubang kaliwatan sa kalibutan.
Ikaduhang tinubdan sa pagkamalipayon sa mga Pilipino mao ang gahum sa pagtoo kun ‘power of faith.’
Sigun ni Hocson, sa kinatibuk-an ang pagtoo kun faith maoy nagpahimsog sa kinaiya sa mga Pilipino aron magpuyo nga malipayon diin bisan pa og unsa ka bug-at sa mga pagsulay, maka-tingsi sa gihapon.
Sa wala pa madiskubre ni Portuguese explorer Ferdinand Magellan ang Pilipinas (Marso 16, 1521), ang mga Pilipino nahasa na sa pakig-relasyon sa silingang nasud sa China, Indonesia, Malaysia, Vietnam, ug Thailand nga nagpahulma sa kinaiyang pagkamalipayon sa tanang Pinoy karon.
Alang kang Villafuerte, garbo niya nga siya gipanganak nga Pilipino ug Dabawenya kay naglatay sa iyang mga kaugatan ug sa tanang mga Pinoy ang kinaiyang pagkamalipayon.
RadyoMaN Joel Viray
