Davao City – Naglaum karon ang Autonomous Region in Muslim Mindanao kun ARMM nga mamahimong hapsay ug walay kakulian nga mahitabo sa gipahigayong plebisito sa Bangsamoro Organic Law kun BOL karong adlawa sa Lanao del Norte ug North Cotabato City.
Sumala ni Atty. Randolph Parcasio, ARMM spokesperson atol sa AFP-PNP presscon, gipaniguro karon sa otoridad ang seguridad sa ginapahigayong plebisito sa BOL taliwala sa pipila ka mga natalang pagbusikad sa bomba sa Lanao kagahapong adlawa.
Samtang giklaro usab sa tigpamaba ang formula sa pag-apil sa mga munisipalidad sa BOL diin matud pa nga bisan og mayorya sa mga botante gikan sa unom ka munisipalidad sa Lanao del Norte ug 39 sa North Cotabato ang muuyon niini apan mayorya sa tibuok probinsya ang nagboto nga dili, dili gihapon kini maapil sa BOL ug ginatawag nila kini nga double majority.
Dugang niya nga paghuman sa plebisito karong adlawa, gilauman na nga si Presidente Rodrigo Duterte mupili og miyembro sa Bangsamoro Transition Authority padulong na sa proseso sa pag abolisar sa ARMM.
RadyoMaN Renz Barbarona
