Davao City – Aron malikay ang mga estudyante sa disgrasya o mga insidente panahon sa mga linog o mga pagtay-og, gisugyot karon sa KABALIKAT Civicom nga magbaton og hard hat ang mga eskwelahan kun kalo nga makatabang batok sa mga ‘debris’ nga posibleng mahulog panahon sa linog.
Sa interbyu sa DXDC RMN Davao kang Prime Cruz, head sa KABALIKAT Civicom Davao City Chapter, gibutyag niini nga kinahanglang i-obliga na ang mga tulunghaan nga magbaton og hard hat ang mga estudyante.
“Dapat i-require na gyud ang mga eskwelahan og hard hat sa mga bata kay dili nato matagna ang panahon kay medyo nagkaproblema ta sa construction labi na sa mga public school buildings,” saysay ni Cruz.
Gibutyag ni Cruz nga mas angay magbaton niini ang grade school or lower grades sama sa kindergarten ngadto sa grade 3 nga mas delikado sa disgrasya tungod kay mas daling magpanic ang nahisgutan.
Nasayran nga nagbaton og mga ‘crack’ kun liki ang pipila ka mga school buildings sa dakbayan human sa 6.3 magnitude nga linog niadtong Oktubre 16, 2019.
RadyoMaN Kirby Manzon
