Ginduso ni Councilor Joshua Alim nga hatagan sang dugang nga poder ang Public Safety and Transportation Management Office nga maghiwat sang ocular inspection sa mga construction sites agud mapasiguro ang safety sang publiko.
Nagpasar si Alim sang resolusyon nga nagahingyo sa Committee on Public Safety and Trasportation nga magdihon sang ordinansa nga nagahatag sang poder sa nasambit nga opisina nga ginapamunuan ni Mr. Jeck Conlu.
Ginhimo ni Alim ang tikang matapos wala ginpasugtan sang SM strata nga maghiwat sang ocular inspection si Conlu sa construction site agud lantawon ang sitwasyon kon bala safety ukon indi para sa publiko.
Kasunod ini sang natabu nga insidente kon sa diin nautod ang tiil sang isa ka dispatcher matapos mahulugan sang hook sang crane halin sa ibabaw sang gina-construct nga building sang nakaligad nga Sabado de Gloria.
