Davao City – Tulo ka mga managsuong nag-edad 13 anyos, 11 anyos ug 7 anyos ang nakalas ang mga kinabuhi human nga giunay kini og dunggab sa ilang kaugalingong amahan samtang hinanok pa kini nga nangatulog bandang alas 11 kagabie sulod mismo sa ilang panimalay sa Purok 1, Brgy. San Isidro, Babak District, Island Garden City of Samal.
Sa karon nagtinabangay ang mga kabanay uban ang Department of Social Welfare and Development (DSWD) sa Samal alang sa pagpahiluna sa mga bata.
Samtang padayong ginaluwas sa mga doktor sa Southern Philippines Medical Center (SPMC) ang 4-anyos nila nga manghod kinsa kritikal usab ang kondisyon sa pagkakaron.
Sumala ni IGACOS PNP OIC PSupt Giuffeppe Geralde nga pasakaan nila og kasong multiple parricide ug frustrated parricide ang 38 anyos nga amahang suspek nga si Joel Nonoy kinsa gikatakdang operahan human nga nisulay kini’g pakamatay pinaagi sa pagdunggab sa iyang tiyan.
“Conscious man ang suspek pero dili man gud mutingog mura man gud og tulala ug lalom kaayo ang gihuna-huna. Ang posible gyod nga hinungdan nganong nabuhat niya ni katong pagbiya sa iyang asawa 2 weeks ago. Allegedly sulti sa iyahang paryente giingnan daw tong asawa before nilakaw nga kung mubiya gyod iyaha gyod daw ‘tong kuanon ang ilang mga anak,” matud ni Geralde.
Negatibo ang suspek sa mga criminal records o bisan sa droga matud ni Geralde.
Narekober sa crime scene ang kutsilyo ug sundang.
RadyoMaN Aimee Guinita
