Hitsas na kita sa pertinenteng mga balaud kontra sa practice nga ‘hazing’ kun pagpangulata diha sa membership sa mga Greek-lettered o Latin-nomenclatured fraternities ug sororities sa mga kolehiyo ug unibersidad.
Sa usa ka interview, giklaro ni Senate President Aquilino ‘Koko’ Pimentel III nga anaa na ang Anti-Hazing Law apan ang kamatayon sa 22-anyos nga freshman law student sa University of Sto.Tomas nga si Horacio ‘Acho’ Castillo III subling naghagit karon sa katakos sa atong mga tinugyanan sa balaud.
Matud ni Pimentel, dili na kini isyu sa balaud o legislation kon dili hisgotanan na kini sa ‘good police and investigative works’ sanglit hustisya na alang sa batan-ong biktima ang nag-unang panawagan karon sa katawhan.
Dugang sa Senate President nga dili nato mamahimong pugngan ang presensya sa maong matang sa mga student organizations sanglit aduna kitay gitawag nga ‘freedom of association.’
Sa pikas bahin, nanawagan karon ang inahan sa suspected frat hazing victim nga si Carmela Castillo ngadto sa mga imbestigador nga paspasan ang pagkab-ot sa hustisya alang kang ‘Acho’ uban ang pangaliya nga unta dili mamahimong kawang ang kamatayon sa iyang anak ug nga gumikan niini, mas mamahimong istrikto na ang atong mga balaud.
Sa iyang kabahin, gibutyag ni Sen. Sherwin Gatchalian nga panahon na karon aron i-revisit ang Anti-Hazing Law ilabi na sa posibilidad nga mas patas-an pa ang mga silot kun penalties kontra sa mga pasimuno sa fraternity abuses.
Kahinudoman nga natay-og na sa makadaghan nga higayun ang konsyensya sa nasud gumikan sa mga sensational hazing deaths sama sa nahimong dugoong kamatayon sa kamot sa mga ‘frat elders’ ug ‘masters’ nila ni student Lenny Villa ug Guillo Cesar Servando.
Gani, nisangko na sa punto nga daghan na ang nanawagan sa total ban ug closure sa tanang mga organisasyon nga naglakip sa hazing diha sa ilang mga secret initiation rites.
RadyoMan June Duterte
