Davao City – Sukad sa pagsugod sa pandemya, wala na’y hunong ang Calinan District Health Center sa pagpalapnag sa education campaign unsaon pagsanta sa pagkanat sa makamatay nga kagaw sa Calinan District.
Matud ni District Doctor Dr. Jojit Marbas, sa unang adlaw sa COVID-19 crisis, massive na ang ilang gihimo nga awareness ug pahimangno sa publiko aron dili sila matakbuyan sa maong makamatay nga sakit.
Kamatuoran niana, segun ni Dr. Marbas mao nga hangtud karon ang Calinan area wala pa gihapon mahitaboan og local transmission sa COVID-19 sama sa nahitabo sa ubang barangay sa siyudad sa Dabaw.
Wala gilimod ni Dr. Marbas nga nakatala sila og kaso sa miaging mga buwan apan tungod kadto sa pag-uli sa Locally Stranded Individuals (LSIs) ug kagahi sa ulo sa pagsunod sa health protocols sa uban.
Subay niini, gi-awhag ni Dr. Marbas ang katawhan nga likayan na lang una ang mga Christmas parties hangtud nga walay bakuna kay aron masumpo ang pagtakod sa virus sa ubang mga tawo.
Dugang sa District Doctor nga makahimo sa selebrar sa pasko ang tanan og walay party mahitabo sanglit ang mensahe sa pasko pwede ibutang sa kasingkasing ug ikinabuhi sa tanang panahon.
“Dapat mag -adjust ta. So since mag-celebrate na pod ta kay duol na pod ang pasko, still walay mausab, mag-observe gihapon ta og precaution kay anyway ang pasko naa raman na sa atong kasingkasing sa bawat tao kay love man gihapon ang atoang buhaton,” segun ni Dr. Marbas.
Love one another and respect and let spread the real essence of Christmas, ang pagkatawo sa Ginoo.
RadyoMaN Joel Viray
