Davao City – Ning panahon sa COVID-19, walay laing angay paminawon ang katawhan ilabi na mahitungod sa mga rekomendasyon sa panglawas kon dili mga health and medical experts and authorities.
Gibutyag sa founder sa Torch of God Ministry, Inc. Dr. Luther Meniano nga kon girekomendar sa gobyerno ang pagsuot og face mask ug face shield aron mabatukan ang COVID-19, nan angay tumanon kini sa publiko.
Segun ni Meniano, supak siya sa pamahayag ni kanhi Lipa Batangas Archbishop Ramon Arguelles nga dili na kinahanglang magsul-ob og face coverings sanglit dili man gayud kita pasagdan sa Kahitas-an.
Dugang ni Meniano nga ang dili pagsul-ob ug face mask ug face shield matawag kini nga usa ka matang sa pagpasagad sa atong tawhanong responsibilidad nga pagpanalipod sa atong kaugalingon gikan sa mga balatian sama sa virus.
“Kabahin sa atong pagtoo ngadto sa Diyos, usa usab ang pag-atiman sa atong kaugalingon nga kon adunay nagarekomendar nga gobyerno (nga magsuot og facemask ug face shield), gikinahanglang tumanon pero kung (mo-ingon si Arguelles) nga dili na (kita) magsuot (og face coverings) kay aduna may Diyos nga mag-atiman, usa kana (ka matang) sa pagpasagad sa kaugalingon tungod kay kita ania pa man sa laman ug wala sa pa espiritu,” segun ni Meniano.
RadyoMaN Joel Viray
